Google, Facebook և այլ ինտերնետ գիգանտների դատա-կենտրոններն ունեն էներգախնայողության համակարգերի կարիք, քանի որ առանց խնայողության դրանք կարող են էներգիայից զրկել նույնիսկ քաղաքները:
Օրինակ՝ Facebook սոցցանցի նոր դատա-կենտրոնը, որը գտնվում է ԱՄՆ Օրեգոն նահանգի Կրուկ շրջանում, ունի 28 մեգավատտ հզորություն, գրեթե այնքան, ինչքան օգտագործվում էր ամբողջ Կրուկ շրջանում մինչև կենտրոնի բացումը: Նշանակում է, որ սոցցանցը կրկնապատկել է այս շրջանի՝ էներգիայի սպառումը:
Նույնը Google-ի դեպքում է. 2011-ին ընկերության բոլոր դատա-կենտրոնների հզորությունը կազմել է 220 մեգավատտ: Հենց այս պատճառով է, որ Google-ն այդքան մեծ ուշադրություն է դարձնում էներգախնայողական համակարգերին ու արևային մարտկոցներին, որոնք կարող են նվազեցնել ընկերության ծախսերը մի քանի անգամ:
Խնդիրն ունի նաև այլ կողմ. HTTP-հարցումներն այնքան էլ անվտանգ չեն: Google-ի էջում ամեն անգամ որոնում կատարելու դեպքում մթնոլորտ է արտանետվում 0,2-7 գրամ ածխաթթու գազ: Գրող Բրյուս Ստերլինգը դեռևս տասը տարի առաջ ասել է՝ պատկերացնենք, որ ամեն անգամ, երբ մենք enter ենք սեղմում, մեր էկրանի առաջ ծխի փոքրիկ ամպ է բարձրանում: